Орталығымызда жыл сайын 10 қазанда атап өтілетін Дүниежүзілік психикалық денсаулық күніне орай психологиялық қолдау апталығы басталды. 2026 жылы Дүниежүзілік денсаулық сақтау ұйымы бұл күнді адамның жеке тәжірибесіне мән берудің және психикалық денсаулығына қатысты қиындықтарға тап болған адамдардың үнін естудің маңыздылығына арнады.
Онкологиялық ауру адамның денсаулығына тек физикалық тұрғыдан ғана әсер етпейді. Диагноз қою, ұзақ уақыт ем қабылдау, тексеру нәтижелерін күту, өмір салтының өзгеруі және болашаққа деген алаңдаушылық пациенттің өзі үшін де, оның жақындары үшін де үлкен эмоционалдық сынақ болуы мүмкін. Мұндай жағдайда психологиялық көмек әлсіздіктің белгісі емес, адамға көрсетілетін кешенді қолдаудың маңызды бөлігі болып табылады.
Осы мақсатта Орталығымызда Пациенттерге психологиялық қолдау көрсету қызметі жұмыс істейді. Қызметтің негізгі міндеті – пациенттер мен олардың жақындарына эмоционалдық қиындықтарды еңсеруге, ішкі ресурстарын табуға және емделудің әр кезеңінде қажетті қолдауды алуға көмектесу. Қызмет мамандарының жұмысы қолжетімділік, құпиялылық және әр адамның жеке қажеттіліктеріне мұқият қарау қағидаттарына негізделген.
Қызмет құрамында пациенттермен әртүрлі бағыттағы мамандар жұмыс істейді: штаттық психолог, дәрігер-психотерапевт, әлеуметтік қызметкер және үйлестіруші. Мұндай командалық тәсіл эмоционалдық қолдаумен қатар, пациенттерге әлеуметтік және ұйымдастырушылық мәселелерді шешуге бағыт-бағдар беруге мүмкіндік береді.
Психологиялық қолдау апталығы барысында Орталығымызда пациенттер мен олардың жақындарының психоэмоционалдық жағдайы, алаңдаушылық пен күйзелісті еңсеру жолдары, жақын адамдар мен мамандардың қолдауы, сондай-ақ психологиялық денсаулыққа қамқорлық жасаудың емделу және сауығу жолындағы маңызы туралы ақпаратпен бөлісетін боламыз.
