Директордың Ядролық медицина және стратегиялық жоспарлау жөніндегі орынбасары, м.ғ.к. Баян Атантаева және радионуклидтік терапия бөлімінің меңгерушісі Назигүл Есболатова 6–9 қараша аралығында Кипрдің Лимасол қаласында өткен радионуклидтік терапия жөніндегі 20-шы Халықаралық конференцияға (ICRT 2025) қатысты.
ICRT — ядролық медицина саласындағы әлемдік деңгейдегі ең маңызды шаралардың бірі, ол дәстүрлі түрде терапия, диагностика және тераностика мәселелеріне назар аударады. 2025 жылы конференция айрықша тарихи белесті атап өтті: жиырма жылдан кейін іс-шара алғаш рет қайтадан Кипрде ұйымдастырылды — дәл осы елде 2005 жылы алғашқы ICRT конференциясы өткен еді. Биылғы форумды Радионуклидтік терапияның молекулалық халықаралық қауымдастығы (WARMTH) Кипр ядролық медицина қоғамымен (CYSNM) бірлесе өткізіп отыр.
Конференция бағдарламасына шам жағу рәсімі, Аджит Падхи атындағы мемориалдық дәріс, он ғылыми сессия және халықаралық жетекші мамандардың 30-дан астам баяндамасы енгізілді. Негізгі назар радионуклидтік терапия саласындағы соңғы жетістіктерге, клиникалық қолдану мәселелеріне, инновациялық радиофармацевтикалық препараттарға және дербестендірілген медицинаның мүмкіндіктерін кеңейтуге аударылды.
Қазақстан өкілдерінің қатысуы ерекше мәнге ие болды: Б.Ж.Атантаева мен Н.С.Есболатова бастаған делегация ТМД елдерінен барған жалғыз топ болды. Бұл Қазақстанның ядролық медицина саласын дамытуға және халықаралық ғылыми ынтымақтастықты арттыруға қосып отырған үлесінің өсіп келе жатқанын тағы бір мәрте көрсетті.
Қазақстандық мамандардың мұндай ірі Халықаралық іс-шараға қатысуы кәсіби байланыстарды нығайтуға, озық тәжірибемен алмасуға және радионуклидтік терапия саласындағы заманауи тәсілдерді елімізге енгізуге ықпал етеді.
