Ядролық медицина және онкология орталығында Ғылыми-клиникалық кеңестің отырысы өтті

Бүгін біздің Орталығымызда Ғылыми-клиникалық кеңестің кезекті отырысы өтті. Отырыста Орталықтың ғылыми аккредитациядан өтуге дайындығы, қажетті құжаттар пакетін қалыптастыру және қызметкерлердің ғылыми қызметі туралы ақпарат жинау мәселелері қаралды. Кеңес мүшелері басылым белсенділігін арттыру шаралары мен ғылыми жұмыстың даму перспективаларын талқылады.

Сонымен қатар, отырыста 2025 жылғы «Жылдың үздік ғылыми қызметкері» мемлекеттік жыл сайынғы ғылыми сыйлығы Орталығымыздың PhD, медицина сарапшысы Шалтынов Асхат Тоқтаровичке берілгені атап өтілді. Бұл марапат ел бойынша тек 50 үздік ғалымға беріледі және ғылым, медицина мен технологияның дамуына сіңірген айрықша үлесін мойындайды.

Асхат Тоқтарович шынайы ғалымдық жолды басынан өткерді: Семей медицина университетін қоғамдық денсаулық сақтау мамандығы бойынша бітіріп, магистрлік және докторлық диссертацияларын қорғады. Оның ғылыми зерттеулері медициналық ресурстарды теңсіз бөлу, науқастардың қаржылық қорғанысы және балаларды вакцинациялау сияқты өзекті тақырыптарды қамтиды. Асхат Тоқтаровичтің халықаралық журналдардағы жарияланымдары Қазақстанда ғана емес, әлемдік деңгейде де медицинаның дамуына әсерін растайды.