10 жылдық игі істер: Асқар Жакулин атындағы қайырымдылық қоры мерейтойын атап өтті

Алматы қаласында Асқар Жакулин атындағы қайырымдылық қорының 10 жылдығына арналған салтанатты іс-шара өтті. Мерейтойлық кездесуге медицина саласының өкілдері, қоғамдық ұйымдар, қордың серіктестері мен достары қатысты. Бұл маңызды шараға Ядролық медицина және онкология орталығы да қатысып, Орталық атынан пациенттерге психологиялық қолдау қызметінің жетекшісі, сарапшы-дәрігер Мұхтарғазы Төлеутаев іс-шараның қонағы болды.
             Іс-шара бағдарламасына сәйкес, қонақтар үшін қайырымдылық пен әлеуметтік қолдау мәселелеріне арналған форум мен дөңгелек үстел ұйымдастырылды. Сонымен қатар қатысушылар Қордың қызметімен танысып, еркін форматта пікір алмасуға мүмкіндік алды. Мерейтой қордың он жылдық жұмысының қорытындысын шығаруға ғана емес, сонымен қатар жақсылық жасап, адамдарға көмектесуді мақсат еткен жандарды біріктірген маңызды алаңға айналды.
          Асқар Жакулин атындағы қайырымдылық қоры көптеген жылдар бойы Қазақстанда әлеуметтік маңызы бар жобаларды жүзеге асырып келеді. Қор білім беру, спорт, денсаулық сақтау салаларын қолдауға, медициналық инфрақұрылымды дамытуға және емделуге мұқтаж жандарға көмек көрсетуге бағытталған бастамаларды жүзеге асырып келеді. Белсенді қайырымдылық қызметінің арқасында қор еліміздегі көптеген медициналық ұйымдардың сенімді серіктесіне айналды.
          Ядролық медицина және онкология орталығы үшін Асқар Жакулин атындағы қайырымдылық қорымен ынтымақтастықтың маңызы ерекше, Қор көптеген жылдар бойы өңірдегі онкологиялық қызметтің дамуына елеулі қолдау көрсетіп келеді. Қордың қолдауы арқасында Орталыққа заманауи медициналық жабдықтар сатып алынды. Бүгінде бұл жабдықтар онкологиялық аурулары бар пациенттерді диагностикалау мен емдеуде кеңінен қолданылып келеді. Бұл дәрігерлерге заманауи медициналық технологияларды пайдаланып, емдеудің тиімділігін арттыруға, ал пациенттерге сауығып кетуге деген үміт пен сенімді күшейтуге мүмкіндік береді.
          Қайырымдылық ұйымдарының қолдауы медицинаның дамуына зор үлес қосады. Осындай игі бастамалардың арқасында емдеудің жаңа әдістері енгізіліп, медициналық мекемелердің мүмкіндіктері кеңейіп, көрсетілетін медициналық көмектің сапасы арта түседі. Қайырымдылық – адамдарды ең басты құндылықтың айналасына біріктіретін күш, ол – адамның өмірі мен денсаулығына деген қамқорлық.
          Ядролық медицина және онкология орталығы атынан Асқар Жакулин атындағы қайырымдылық қорына көпжылдық нәтижелі ынтымақтастық, медициналық ұйымдарға көрсеткен қолдауы және Абай облысындағы онкологиялық қызметтің дамуына қосқан үлесі үшін шынайы алғыс білдіреміз. Қорға алдағы уақытта да жаңа жобаларды табысты жүзеге асырып, игі істерін жалғастыра беруді және көптеген адамдардың өмірін жақсартуға септігін тигізе беруді тілейміз.