Медицина қызметкері күніне арналған салтанатты іс-шара барысында Абай облысы денсаулық сақтау басқармасының «Ядролық медицина және онкология орталығы» ШЖҚ КМК инфекциялық бақылау қызметінің мейіргері Кондакирова Бақыт Маратқызы денсаулық сақтау саласындағы жоғары марапаттардың бірі – «Денсаулық сақтау ісінің үздігі» орденімен марапатталды.
Бұл марапат – көп жылғы адал еңбегінің, жоғары кәсібилігінің, жауапкершілігінің және Қазақстан Республикасының денсаулық сақтау жүйесін дамытуға қосқан елеулі үлесінің айқын көрінісі.
Бақыт Маратқызы саналы ғұмырын медицина саласына арнаған жан. Семей мемлекеттік медицина училищесін тәмамдағаннан кейін еңбек жолын Ақсуат аудандық ауруханасының жедел медициналық жәрдем бөлімінде фельдшер болып бастаған. Сол уақыттан бері оның кәсіби қызметі адамдардың денсаулығын сақтауға, науқастарға қамқорлық көрсетуге және абзал мамандықтың биік мұраттарына қызмет етуге бағытталып келеді.
Бақыт Маратқызы Ядролық медицина және онкология орталығында 36 жылдан бері жемісті еңбек етіп келеді. Осы уақыт ішінде ол ұжымның тәжірибелі әрі құрметті мамандарының біріне айналды. Еңбек жолының 18 жылын хирургия бөлімшесінде мейіргер ретінде өткізіп, пациенттерге кәсіби көмек көрсетуде жоғары біліктілігі мен жанашырлығын танытты. Кейін 12 жыл бойы химиотерапия бөлімшесінің аға мейіргері қызметін атқарып, емдеу процесін ұйымдастыруға және орта буын медицина қызметкерлерінің жұмысын үйлестіруге зор үлес қосты. Ал соңғы бес жылдан астам уақыт бойы инфекциялық бақылау қызметінде еңбек етіп, санитариялық-эпидемиологиялық қауіпсіздікті қамтамасыз ету және пациенттер мен қызметкерлер үшін қауіпсіз орта қалыптастыру бағытында табысты жұмыс атқарып келеді.
Көпжылдық еңбегі барысында ол әріптестерінің зор құрметіне, пациенттердің шынайы алғысына бөленіп, кәсіби борышына адал, жауапкершілігі жоғары, тәртіпті және өз ісіне берілген маман ретінде танылды.
Инфекциялық бақылау саласындағы жұмыс асқан мұқияттылықты, терең білімді және кез келген жағдайға жедел әрекет ету қабілетін талап етеді. Осындай білікті мамандардың арқасында медициналық ұйымдарда қауіпсіздік пен медициналық көмектің жоғары сапа стандарттары қамтамасыз етіледі.
Ядролық медицина және онкология орталығының ұжымы Бақыт Маратқызын жоғары марапатымен шын жүректен құттықтайды!
Сізге зор денсаулық, отбасыңызға амандық, бақ-береке, сарқылмас күш-қуат, мол бақыт және жаңа кәсіби жетістіктер тілейміз. Көп жылғы адал еңбегіңіз, мамандыққа деген шексіз сүйіспеншілігіңіз бен адам денсаулығына деген жанашырлығыңыз жас мамандарға әрдайым үлгі болсын. Ал бүгінгі марапат кәсіби шеберлігіңіз бен таңдаған ісіңізге деген адалдығыңыздың тағы бір жарқын дәлелі болғай. Жоғары марапатыңыз құтты болсын! Еліміздің денсаулық сақтау саласының дамуына қосып жүрген еңбегіңіз әрдайым бағаланып, жаңа жетістіктерге жете беруіңізге тілектеспіз!
