Бүгін Ядролық медицина және онкология орталығының директоры Саят Танатаров бастаған делегация Алматы қаласында өтіп жатқан ірі халықаралық денсаулық сақтау көрмесі — KIHE 2026 жұмысына қатысты. Аталған көрме медицина саласының жетекші өкілдерін, медициналық жабдық өндірушілерін, фармацевтикалық компанияларды және әлемнің түрлі елдерінен келген сарапшыларды бір алаңға біріктірді.
KIHE көрмесі медицина және денсаулық сақтау саласындағы Орталық Азиядағы ең ірі кәсіби алаңдардың бірі болып саналады. Биылғы көрмеде заманауи медициналық технологиялар, жоғары технологиялық жабдықтар, диагностика, емдеу, оңалту, цифрландыру және медициналық менеджмент салаларындағы инновациялық шешімдер ұсынылған. Қатысушылар әлемдік медицинаның соңғы жетістіктерімен танысып, саланың өзекті үрдістерін талқылап, жаңа кәсіби байланыстар орнатуға мүмкіндік алуда.
Мұндай халықаралық алаңдардың еліміз бен өңірлердегі онкологиялық қызметті дамытудағы маңызы ерекше. Қазіргі онкология инновациялық технологияларды енгізумен, диагностика мен емдеу әдістерін жетілдірумен, сондай-ақ медицина мамандарының кәсіби құзыреттерін тұрақты түрде арттырумен тығыз байланысты. Көрмеге қатысу радиациялық онкология, ядролық медицина және жоғары технологиялық медициналық көмек салаларындағы озық халықаралық тәжірибені зерделеуге мүмкіндік береді.
Көрме аясында Орталық өкілдері денсаулық сақтау жүйесіне белсенді енгізіліп жатқан жаңа медициналық әзірлемелермен, заманауи жабдықтармен және перспективты технологиялық шешімдермен танысты. Сонымен қатар KIHE 2026 көрмесіне қатысу кәсіби байланыстарды нығайтуға, тәжірибе алмасуға және халықаралық ынтымақтастықты дамытуға маңызды мүмкіндік болды.
