Госпитальдық фармация бөлімі

Бөлімнің барлық қызметі толық цифрландырылған және Damumed, 1С-Бухгалтерия және ДЗҚЖ (дәрілік заттарды қадағалау жүйесі) интеграцияланған ақпараттық жүйелерінде жүргізіледі.

Бөлімнің негізгі міндеті

Медициналық ұйым пациенттерін тегін медициналық көмектің кепілдік берілген көлемі (ТМККК) шеңберінде қауіпсіз, тиімді және сапалы дәрілік заттармен және медициналық бұйымдармен қамтамасыз ету, сондай-ақ оларды ұтымды пайдалануды қамтамасыз ету.

Бөлімнің функциялары

Алға қойылған міндеттерді іске асыру мақсатында Бөлім негізгі бағыттар бойынша бөлінген мынадай функцияларды жүзеге асырады:

1. Қорларды басқару, жоспарлау және сатып алу

• Қажеттілікті айқындау және талдау: Дәрілік заттар мен медициналық бұйымдарды жеткізуге өтінімдерді қалыптастыру кезінде, оның ішінде жылдық өтінімді («СК-Фармация» бірыңғай дистрибьюторы арқылы және дербес сатып алу кезінде) қалыптастыру және оған кейінгі түзетулер енгізу барысында ДЗ және МБ-ға нақты қажеттілікті талдау және айқындау.
• Өтінімдерді жинау және қалыптастыру: Медициналық ұйымның барлық клиникалық бөлімшелерінен дәрілік заттар мен медициналық бұйымдарға келіп түскен өтінімдерді орталықтандырылған түрде жинау және жиынтық өтінімдерді қалыптастыру.
• Стратегиялық жоспарлау: Стационарды дәрілік заттармен және медициналық бұйымдармен үздіксіз қамтамасыз ету мақсатында Бөлім жұмысының перспективалық жоспарларын әзірлеу және олардың іске асырылуын қамтамасыз ету.

2. Қабылдау, есепке алу және тиісті сақтауды қамтамасыз ету

• Қабылдауды жүзеге асыру: Дәрілік заттар мен медициналық бұйымдарды қабылдау, ілеспе құжаттаманы тексеру, сондай-ақ олардың түпнұсқалығын растау үшін мемлекеттік цифрлық таңбалау жүйесінде кодтарды сканерлеу.
• Тиісті сақтау: 1С-Бухгалтерия жүйесінде олардың серияларын, партияларын және жарамдылық мерзімдерін автоматты түрде тіркей отырып, ДЗ мен МБ-ны тиісті сақтау мен есепке алуды қамтамасыз ету. Орталық аумағында өнімдерді сақтау орындарына орналастыру кезінде температуралық режимдерді және GPP (Тиісті дәріханалық практика) стандарттарын сақтау.
• Жоғары тәуекелді дәрілік заттарды мониторингтеу: Жоғары тәуекелді дәрілік заттардың, оның ішінде есірткі, психотроптық заттар мен заттық-сандық есепке алынатын препараттардың сақталу жағдайларына, есепке алынуына және арнайы таңбалануына тұрақты әрі қатаң мониторинг жүргізу.

3. Өндіріс, логистика және дербестендіріп қолдану

• Орталықтандырылған дайындау: Дәрілік заттар мен медициналық бұйымдарды орталықтандырылған түрде дайындау, өлшеп-орау және сұйылту, кейін оларды медициналық ұйымның құрылымдық бөлімшелеріне жедел бөлу.
• Damumed жүйесімен интеграция: Damumed жүйесіндегі электрондық тағайындау парақтары негізінде дәрілік заттарды пациенттер бойынша дербестендіріп есептен шығару және беру. Бұл әрбір препараттың жұмсалуын нақты уақыт режимінде нақты пациентпен байланыстыруға мүмкіндік береді.
• Кәдеге жарату: Дәрілік заттар мен медициналық бұйымдарды Қазақстан Республикасының қолданыстағы заңнамасында белгіленген тәртіпке сәйкес уақтылы және қауіпсіз жою (кәдеге жарату) процестерін ұйымдастыру.

4. Клиникалық фармация және пациенттердің қауіпсіздігі

• Формулярлық комиссияның жұмысына қатысу: Медициналық ұйымның формулярлық комиссиясының жұмысына белсенді қатысу, сондай-ақ клиниканың жергілікті дәрілік формулярын әзірлеуге, өзектендіруге және енгізуге тікелей қатысу.
• Медициналық қателердің алдын алу: Бөлімшелердің посттарында дәрілік заттарды дұрыс енгізбеуге, сақтауға, дозалауға және дайындауға байланысты анықталған дәрілік қателерді жоюға бағытталған кешенді іс-шараларды әзірлеу және өткізу.